Natangag sa usa ka supek ang mokapin sa P1.3 million nga kantidad sa salapi human giransak ang Barnyard Veterinary Supply sa Cagampang Street, Brgy. Dadiangas South, ning Dakbayan.
Matod sa hepe sa Bula Police Station nga si PCaptain Ian Bagot nakadawat sila og tawag gikan sa tag-iya sa establisyemento nga si Ralph Francis Garcia, 27-anyos, taga GenSan, alas otso ang takna sa buntag aron e report ang nahitabo nga pag-pangawat sa iyang tindahan.
Sa pag-imbestiga sa kapulisan nasayran nga kaniadto pang Sabado, Agosto 6 sa gabie giransak ang naasoy nga tindahan apan ulahi na kini namatikdan sa tag-iya. Pinaagi sa CCTV footage nga naka install sa lugar, nailhan sa mga otoridad ang suspek nga trabahante usab sa maong establisyemento nga si Joelito Lumapguid Ytang 21-anyos, ulitawo, nga taga Brgy. Ligaya, ning syudad. Giguba matud pa sa suspek ang screen wall ug didto siya misulod ug gikawat ang maong kantidad. Sa pagkakarun gipangita na sa kapulisan ang suspek.
Samtang nagpahigayon na usab og imbestigasyon ang mga personahe sa SOCO ug gikolekta ang tanang ebidensya nga nakuha gikan sa lugar. Sa pikas bahin, gi-plantsa na usab sa Bula Police station ang mga dokumento aron mapasakaan og kaso ang suspek sa pagpangawat.
