Nagpabiling dili sigurado ang pagdula ni naturalized player Justin Brownlee alang sa Gilas Pilipinas sa umaabot nga dula niini sa 2027 FIBA Basketball World Cup Asian Qualifiers karong Nobyembre.
Matod ni Gilas head coach Tim Cone, wala pa siyay nadawat nga kumpirmasyon bahin sa kahimtang ni Brownlee ug kung makaapil ba kini sa umaabot nga kampanya sa national team.
Dugay nang wala makadula si Brownlee alang sa Gilas ug Barangay Ginebra tungod sa iyang problema sa panglawas, lakip na ang blood pressure ug kasingkasing.
Gilauman unta nga mahimong kabahin siya sa lineup sa Gilas alang sa ilang dula batok Syria sa Nobyembre 27 ug Iran sa Nobyembre 29 nga ipahigayon sa Malaysia. Sa pagkakaron, anaa sa ikalimang puwesto sa Group E ang Gilas Pilipinas nga adunay upat ka daog ug upat ka kapildihan sa maong qualifiers.
