GENERAL SANTOS CITY – Nanawagan sa mayor ang mga apektadong residente nga malakip sa listahan sa mga mabalhin sa relocation site sa syudad human nga naguba ang panimalay human nga gihapak sa dagkong mga balod.
Sa nakalap nga impormasyon sa Bombo Radyo GenSan sa Barangay Disaster Risk Reduction and Management Council, 32 ka balay gikan sa tulo ka purok sa Brgy. Dadiangas West partikular sa San Roque, San Vicente og San Juan ang naguba human nga gihapak sa dagkong balod sa Sarangani Bay.
Sa maong ihap, walo niini ang totally damaged og 24 ang partially damaged.
Matud sa usa sa nagub-an og balay, kalit na lang midako ang balud pasado alas 5 sa hapon niadtong Pasko nga hinungdan sa pagkaguba sa nagtapad-tapad nga balay sa lugar.
Sa pakighinabi kang Kag. Isabelita Santiago, ang chairman sa social services committee sa Brgy. Dadiangas West nga mudangop sila sa opisina sa mayor aron mapadangat ang panawagan sa mga apektadong residente nga sila marelokar sa luwas nga lugar.
Una niini, gibutyag sa Pagasa, epekto sa extension sa Bagyong Usman, nga gidunganan sa high tide ug kusog nga hangin gumikan sa dala nga thunderstorms sa bagyo.
