ALABEL, SARANGANI- Nagpahinumdom ang lokal nga pangagamhanan sa Alabel, Sarangani Province sa publiko nga ampingan ang panglawas ug ipadayon ang kalimpyo ug kahapsay sa mga sementeryo atol sa paghinumdom sa mga ilang mga minahal karong Kalag-kalag.
Giawhag sa LGU-Alabel ang mga mobisita sa sementeryo nga kanunayng moinom og tubig aron malikayan ang dehydration tungod sa init nga panahon, mopahulay kon gikinahanglan ug mangitag landong aron malikayan ang sobrang kainit.
Gipahinumdoman usab ang publiko sa hustong paglabay sa basura pinaagi sa paggamit sa mga basurahan ug garbage sack nga gibutang sa nagkalain-laing dapit sulod sa sementeryo.
Gidili usab ang paglabay sa mga plastik, botelya, food wrappers ug uban pang basura bisan asa aron mapadayon ang kalimpyo ug kahapsay sa palibot.
Matod sa lokal nga pangagamhanan, gikinahanglan ang kooperasyon ug disiplina sa matag usa aron masiguro ang luwas, limpyo ug malinawon nga pagsaulog sa Kalag-kalag.
