GENSAN- Nakaplagan na nga wala nay kinabuhi ang usa ka babaye human madiskubre ang iyang lawas sa usa ka hilit nga dapit sa Purok 28, Recvill, Barangay San Jose kagahapong adlawa.
Giila ang biktima nga si Nety Aquino Gomez, 42 anyos, walay trabaho, ug residente sa Purok VARBC, Barangay San Jose, maong dakbayan.
Base sa imbestigasyon sa kapulisan, kalit nga milakaw ang biktima niadtong Mayo 3, 2026 sa alas 3:00 sa kadlawon ug wala na kini mobalik sa ilang panimalay. Niadtong Mayo 4, gi-report sa iyang kabanay ang iyang pagkawala.
Human sa upat ka adlaw nga search operation, ang lawas sa biktima nakaplagan ni Tito Malayan Emnace, 58 anyos, residente sa Barangay San Jose, kinsa dayon nagpahibalo sa kapulisan.
Nakaplagan usab sa lugar ang usa ka pink nga bag nga sulod ang mga sinina, cellphone, ug kantidad nga ₱10,500.00 nga dayon girecover ug gitugyan sa pamilya sa biktima.
Ang lawas gidala sa usa ka punerarya alang sa post-mortem examination samtang padayon pa ang imbestigasyon sa kapulisan aron masuta ang tinuod nga hinungdan sa kamatayon.
