GENERAL SANTOS CITY – Malampuson ang gihimong search warrant operation sa kapulisan nga gihimo sa Purok Linglingay, Barangay New Carmen, Tacurong City nga nakumpiska ang kapin sa P500,000 nga kantidad sa ilegal nga droga.
Gumikan niini nasikop si alias “King”, legal age, nga residente sa maong dapit.
Ang operasyon ang gihimo sa mga personahe sa Tacurong City Police Station, Provincial Drug Enforcement Unit, Provincial Intelligence Unit sa Sultan Kudarat Police Provincial Office kung asa duha ka search warrants ang ilang gi-apply.
Kini may kalabutan sa violation sa Republic Act 9165 og Republic Act 10591, nga ang search warrant ang gi-isyu sa Acting Presiding Judge sa RTC Branch 20, Tacurong City.
Atol sa operasyon nakumpiska sa mga otoridad ang usa ka unit sa caliber .38 revolver nga walay serial number, upat ka mga buhing bala, usa ka empty shell sa caliber .38, siyam ka buok nga sachet sa shabu nga anaa sa 77.83 grams og may standard drug price nga P 529,244.00, lakip ang laing mga drug paraphernalia.
