Gihangyo sa mga taxi driver ang mga operator nga ipacalibrate na ang ilang mga metrohan sa pasahe, ilabina nga dugay na wala mausab ang kasamtangang 40 pesos nga flag-down rate.
Sumala sa mga driver, sukad pa niadtong 2014 wala na mausab ang maong rate bisan pa sa padayon nga pagsaka sa presyo sa gasolina, maintenance, spare parts ug uban pang gasto sa operasyon.
Matud ni Ryan Ayod, dugay na nilang gihangyo ang pag-adjust sa pasahe aron mas makasabay sa nagkadugang nga gasto sa ilang panginabuhian.
Giingon sa mga driver nga adunay ubang lugar nga mas taas na ang flag-down rate ug moabot sa 65 pesos, busa ilang nakita nga angay nang susihon ug i-review ang kasamtangang taxi fare sa ilang lugar.
Dugang pa nila, dili lamang ang ilang kita ang ilang gikonsiderar, kundili apil usab ang kahimtang sa mga pasahero, mao nga gusto nilang adunay klaro ug opisyal nga pagrepaso sa kasamtangang fare structure.
Tungod niini, gihangyo nila ang Land Transportation Franchising and Regulatory Board o LTFRB nga aksyunan ang ilang hangyo ug susihon ang posibilidad sa pag-adjust sa taxi fare, uban sa konsultasyon sa mga driver, operator ug pasahero aron matino ang angay ug makatarunganong pasahe base sa kasamtangang gasto sa operasyon.
