Duha ka maghigala gikan sa California, Estados Unidos ang nakamugna og Guinness World Record human nila matukod ang tanang 11,695 ka piraso sa Lego World Map sulod lang sa 4 ka oras, 59 minutos ug 51 segundos.
Gihimo nila Athena Leong ug Sevy Swift ang maong hagit niadtong Abril 12 sa Brick by Brick Toys sa Hayward, human sila migahin og usa ka bulan sa pagpraktis gamit ang Lego World Map.
Ang maong set giila isip pinakadakong ‘commercially available’ nga ‘two-dimensional Lego set’.
Sumala ni Leong, ang Lego dugay nang nahimong paagi niya sa pagpahayag sa iyang imahinasyon ug mas napalig-on pa kini sa ilang panaghigalaay ni Swift tungod sa ilang komon nga interes sa Lego.
Nalabwan sa duha ang gitakdang target sa Guinness World Records nga lima ka oras ug 30 minutos human nila mahuman ang mapa sa wala pa molapas og lima ka oras.
Matud ni Swift, nakatabang sa ilang pagpadali sa pagbuhat ang pagtrabaho usa ka kolor matag higayon ug ang husto nga han-ay sa pagbutang sa mga piraso.
