Gi-lockdown sa Isulan Municipal Police Station ang Isulan National High School sa Barangay Kalawag 1, Isulan, Sultan Kudarat human sa nadungog nga kusog nga paglupok sulod sa eskwelahan alas-10:26 sa buntag karong Miyerkules, Setyembre 30, 2026.
Dali nga mitubag ang mga awtoridad ug gilayon nga gisiguro ang lugar samtang gipangita ang eksaktong gigikanan sa maong paglupok.
Matod ni Isulan Mayor Bai Rihan Mangudadatu Sakaluran, anaa gihapon sa kontrol sa Philippine National Police ang eskwelahan samtang nagpadayon ang imbestigasyon.
Wala usab nay gikataho nga namatay o nasamdan may kalabotan sa insidente, ug wala pay nakit-ang basyo sa bala sulod sa eskwelahan base sa inisyal nga report.
Gikumpirma usab sa usa ka magtutudlo nga walay nahitabong hostage-taking incident ug luwas ang mga estudyante ug magtutudlo sulod sa eskwelahan.
Samtang, gipahinumdoman ni Kahar Dalaten, Chief of Staff ni Sultan Kudarat Governor Datu Pax Mangudadatu, ang mga estudyante nga dili magpataka og gamit og mga paputok sama sa piccolo ug triangle ilabina sulod sa eskwelahan tungod sa peligro nga mahimo niini nga madala.
Gisuspenso usab sa Lokal nga Gobyerno sa Isulan ang tanang klase sa tanang lebel sa mga eskwelahan sa lungsod sugod karong hapon hangtod sa sunod nga pahibalo.
Gihangyo ni Mayor Sakaluran ang publiko nga magpabiling kalmado ug likayan ang pagpakaylap sa dili pa beripikado nga impormasyon samtang nagpadayon ang imbestigasyon.
