Mitingog na ang aktor nga si Patrick Garcia bahin sa dugay nang isyu nila sa aktres nga si Jennylyn Mercado ug sa iyang tinguha nga makita pag-usab ang ilang anak nga si Alex Jazz.
Sa iyang pakighinabi kang Ogie Diaz, giingon ni Patrick nga Disyembre 2017 pa ang kataposang higayon nga nakita niya si Jazz ug sukad 2018, naningkamot na siya nga makontak ang aktres ug ilang anak.
Matud pa niya, wala na motubag si Jennylyn sa iyang mga mensahe ug wala usab siya tugoti nga makabisita kang Jazz.
Gibalik usab ni Patrick ang panahon nga nabuntis si Jennylyn ug giingon nga wala kini sa ilang plano, apan andam silang atubangon ang sitwasyon uban sa ilang mga pamilya.
Giingon sa aktor nga misamot ang ilang panagbangi tungod sa usa ka hypothetical nga pangutana sa interbyu ug sa mga espekulasyon bahin sa pagka-amahan niya sa ilang anak.
Gilimod ni Patrick ang mga sulti nga iyang gibiyaan si Jennylyn ug mipadayag nga mao kini ang iyang unang higayon sa pagsaysay sa iyang panig bahin sa isyu nga iyang gitipigan sulod sa 18 ka tuig.
