GENSAN / SARANGANI -Gisiguro sa Department of Education-General Santos City (DepEd-GenSan) ug sa Department of Education-Sarangani (DepEd-Sarangani) nga andam na ang tanang pampublikong tunghaan sa ilang mga nasasakupan alang sa pormal nga pagbukas sa klase karong Lunes, Hunyo 16, 2025.
Sa padayon nga paningkamot aron masiguro ang hapsay nga pagsugod sa School Year 2025–2026, gi-report sa duha ka dibisyon nga humana ang kadaghanan sa mga preparasyon sa mga eskwelahan, apil na ang mga kalihokan sa Brigada Eskwela ug Oplan Balik Eskwela.
Bisan pa sa katapusan sa opisyal nga enrollment period niadtong Hunyo 13, nagpadayon gihapon ang pipila ka ginikanan sa pagpang-enroll sa ilang mga anak, ilabi na kadtong wala makaapas sa regular nga iskedyul. Gipasabot sa DepEd nga modawat gihapon sila og late enrollees, apan ang ilang pagsulod sa klase mahimong maulahi gamay.
Sa duha ka adlaw nga nabilin una sa klase, padayon ang pagpanglimpyo, pag-ayo sa mga bangko, ug inspeksyon sa mga gamit sa pagtudlo sa mga classroom. Aktibong mitabang ang mga ginikanan ug mga boluntaryo aron mapaspasan ang preparasyon.
Gipangayo usab sa DepEd ang kooperasyon sa mga ginikanan nga andamon ang ilang mga anak sa mental, pisikal, ug emosyonal nga aspeto alang sa unang adlaw sa klase.
Gihangyo sa mga school head nga mas pasayon ang proseso sa pagdawat sa mga magtutungha ug gipaniguro nga mahimugso ang luwas, organisado, ug welcoming nga palibot alang sa tanan.
