Duha ka adlaw human sa pagkahugno sa usa ka building sa Angeles, nanawagan og hustisya ug pagpanubag ang mga pamilya sa mga biktima samtang kapin usa ka dosena ka tawo pa ang wala makita ug gikahadlokang namatay sa trahedya.
Sumala sa mga otoridad, gihimong retrieval operations ang search and rescue efforts niadtong Martes, Mayo 26, human sa duha ka adlaw nga pagpangita sa posibleng mga naluwas.
Gibanabana nga dili moubos sa 16 ka tawo ang gituohang namatay sa insidente.
Matod nila, kinahanglan manubag ang engineer ug tag-iya sa 9 ka andana nga building.
Sumala ni Jay Pelayo, city information officer sa Angeles, nakig-coordinate na ang site engineer sa mga otoridad aron mohatag sa listahan sa mga trabahante nga anaa sa lugar sa dihang nahitabo ang insidente.
Apan hangtod karon, wala pa gihapon mipakita ang tag-iya ug contractor sa building aron mopasabot.
