GENSAN- Gipasiugda sa bag-ong Regional Director sa Police Regional Office 12 nga si P/BGen. Allan Manibog nga andam silang mopatuman sa balaod kon makit-an sa Region 12 si Sen. Ronald dela Rosa kalabot sa gi-isyu nga arrest warrant sa International Criminal Court o ICC.
Matod sa opisyal, obligasyon sa kapulisan ang pagtuman sa bisan unsang mando nga ipatuman sa nasyonal nga gobyerno ug sa mga law enforcement agencies kalabot sa kaso ni Dela Rosa.
Giingon usab niya nga kon mapamatud-an nga anaa sa rehiyon ang senador, molihok dayon sila subay sa naglungtad nga proseso sa balaod.
Hinumdoman nga gikumpirma sa ICC ang arrest warrant batok kang Dela Rosa kalabot sa imbestigasyon sa madugoong war on drugs sa miaging administrasyon.
Una nang giingon sa nasyonal nga gobyerno nga mahimo nilang ipatuman ang warrant pinaagi sa koordinasyon sa Interpol ug uban pang law enforcement agencies.
Samtang, nagpadayon gihapon ang pagpangita sa mga awtoridad kang Dela Rosa human siya mataho nga naglikay sa mga operatiba niadtong milabay nga mga semana.
