Gikuwestiyon sa minority bloc ang giingong “dinalian” nga proseso sa pag-usab sa Senate Rules.
Kini human sa pag-walkout sa minority bloc kagahapon, Martes, Mayo 26, human sa mainit nga diskusyon bahin sa pag-amyenda sa Senate Rules nga motugot sa mga senador nga motambong ug moboto sa plenaryo pinaagi sa online o remote participation.
Ang maong sugot gipasa ni Senador Rodante Marcoleta niadtong Mayo 11, nga nagtumong nga tugotan ang “justifiable” nga remote attendance sa mga miyembro sa Senado.
Sumala sa minority bloc, ginadalian matod pa ang proseso sa pag-amyenda ug wala gihatagan og igong kahigayunan ang tanan nga senador nga makapadayag sa ilang opinyon.
Sa ilang pahayag nga gipaambit sa social media ni Sen. Kiko Pangilinan, ilang giinsistir nga ang maong isyu kinahanglan pa og mas lapad nga diskusyon ug dili ipatuman dayon.
Gikewstyon usab sa minorya kung ginadali ba kini tungod sa posibleng pagboto ni Senator Bato ug sa mga taho nga posibleng adunay mga majority senator nga madakop.
Gipakita sa minorya nga adunay “railroading” o pagdali sa proseso ug nagpasidaan nga mahimo kining makaapekto sa patas nga partisipasyon sa mga senador sa paghimo og balaod.
Tungod sa walkout, napakyas ang plenaryo nga makahimo og quorum mao nga wala nasunod ang sugyot ug gi-adjourn ang sesyon hangtod Hunyo 1.
