Padayon ang search and rescue operation sa usa ka 10 anyos nga batang babaye nga gituohang nalumos human maanod sa Davao River sa Purok 17-A, Lower Madapo, Barangay 5-A, Davao City kaniadtong Mayo 23, 2026.
Sumala sa inisyal nga imbestigasyon sa kapulisan, gitugotan sa inahan ang biktima ug manghod niini nga magdula sa ulan alas 2:00 sa hapon. Apan, miadto diay kini daplin sa suba sa Sto. Niño de Suba uban sa ilang mga ig-agaw ug silingan nga pulos mga menor de edad.
Didto na kuno na-slide ang biktima ug nahulog sa suba, ug dayon gidala sa kusog nga sulog sa tubig padulong sa tunga-tunga sa sapa hangtod sa wala na kini makita.
Miresponde gilayon ang mga sakop Philippine Coast Guard, Central 911 USAR ug EMS teams, uban ang mga miyembro sa Barangay Disaster Risk Reduction and Management Councils (BDRRMC), aron magsugod og joint search and rescue operation.
Hangtod sa pagkakaron, padayon gihapon ang pagpangita sa biktima samtang wala pa kini mitungha sa katubigan.
Gihangyo sa mga otoridad ang publiko nga mag-amping ug likayan ang pagduol sa mga suba samtang kusog ang ulan ug paspas ang sulog sa tubig.
