GENERAL SANTOS CITY – Tulo ka boksingero sa Socsksargen Region ang midaug atol sa 1st day elimination sa dulang boxing sa nagpadayon nga 2019 Palarong Pambansa sa Davao City.
Gibutyag sa Bombo Radyo ni GenSan boxing analyst Arnel Antiporda, napulo ka weight category ang giawayan kagahapon alang sa Youth Boys og All Boys Category.
Sumala pa, nakadaug ang mga taga South Cotabato boxers via ‘short route’ kun buot ipasabot nga wala nahuman nga dula human nga giundang na sa referee tungod milukapa na ang kaatbang.
Gipildi ni Mark Jason Solano ang kalaban nga taga Region 11(Davao Region) via 1st round Technical Knockout (TKO); samtang si Kenneth Ikinan gipalukapa ang kalaban nga taga BARMM via 2nd round TKO gihapon; og Jose Angelo Villaverde nga taga Suralah South Cotabato, midaug via 3rd round TKO batok sa kalaban nga taga Region 4-A partikular sa Tayabas Quezon.
Ning adlawa may schedule na usab nga mudula ang mga boxers sa Region 12 kung asa galaum si Antiporda nga magdomina gihapon ang mga nasampit sa ilang tagsa tagsa ka weight category.
Samtang, giangkon ni Antiporda nga ang Region 10 (Misamis Oriental og Cagayan de Oro) ang usa sa gilantaw nga ‘close rival’ kon hugot nga kaatbang sa Region 12 sa dulang boxing atol sa Palaro.
Gani, leading kagahapon ang Region 10 sa 1st elimination day nga gipahigayon sa Almendras gym sa Quezon Blvd, Talomo, Davao.
Gibutyag ni Antiporda nga hugot usab nga kaatbang sa dulang boxing ang Davao Region.
Apan kagahapon, natagakan na og usa ka boxer ang Davao Region human nga gipildi sa boksingero gikan sa Socsksargen.
Dugang pa sa nasampit, gahi og mga maayo usab ang mga boksingero gikan sa BARMM.
Galaum si Antiporda nga magdaug ang tanang boksingero sa Socsksargen aron muabanse sa quarter finals alang sa tiyansa nga makaabot sa finals.
