Nakaplagan ang lawas sa usa ka lalaki nga anaa na sa state of decomposition sa Barangay Alegria, Alabel, Sarangani Province kagahapong adlawa.
Sumala kang PLtC. Benjie Ancheta, station commander sa Alabel Municipal Police Station, ang biktima giila nga si Willie Guinang.
Matud niya, nakadawat sila og report mahitungod sa usa ka patay nga lawas nga nakit-an nga nagbulag ang ulo ug lawas, ug ginatan-aw nga posible nga nagbigti ang biktima.
Kahinumduman nga si Guinang mao usab ang persona nga gipangita sa mga otoridad human niya nga gidunggab ug napatay ang iyang asawa nga si Mary Grace Guinang gamit ang kutsilyo samtang namulot kini og mga sinina sulod sa usa ka eskwelahan.
Gikompirma usab sa pamilya ni Willie nga siya ang lawas nga ilang nakit-an.
Sa karon, padayon ang imbestigasyon sa Alabel Municipal Police aron matino ang tinuod nga hinungdan sa kamatayon sa biktima, lakip na ang pag-ila sa ubang detalye ug mga posibleng testigo nga makahatag og dugang nga impormasyon.
