GENERAL SANTOS CITY – Nag-courtesy call na sa Police Regional Office 12 si P/Supt. Marvin Marcos isip OIC-regional director sa Criminal Investigation and Detection Group (CIDG)-12.
Luyo nga wala nay gilayong turn-over ceremony sa nasampit, gilayon kining misabak sa Command conference. Gibutyag ni CIDG-12 Assistant Regional Chief PCInsp. Christian Garcia, nakasentro sa pagsumpo sa organized crime group, terorismo og loose firearms ang trabaho ni Supt. Marcos.
Giangkon ni Garcia nga kaila na niya daan si Marcos hinungdan nga nagtuo nga aduna silay maayong working relationship sa CIDG-12. Kahibaluan nga kauban ni Marcos nga nabalhin sa Camp Fermin G. Lira ang walo ka pulis nga silang Supt Santi Matira, PCInsp Leo Laraga, Spo4 Melvin Cayubid, Spo4 Juanito Duarte, Spo1 Benjamin Dacallos, Po3 Jhonny Ybanez, Po1 Bernard Orfella og Po1 Jolan Cabiyaan.
Nasayran nga pakyas nga mahinabi sa media si Marcos tungod mibalibad usab ang nasampit nga muatubang. Kahibaluan nga July 11, 2017 pa epektibo ang re-assignment order ni Marcos.
Una nang gibutyag ni PSupt. Lauro Espida, tigpamaba sa GSCPO nga welcome si Marcos sa GSCPO.
