Nanawagan ang Department of Education-General Santos City pinaagi ni Kenneth Carisma ang Divison Information Officer ngadto sa tanang ginikanan ug mga estudyante nga mangandam na alang sa opisyal nga pagbalik-eskwela karong Hunyo 8 aron masiguro ang hapsay ug organisadong pagbukas sa klase sa nagkalain-laing pampublikong eskwelahan sa siyudad.
Sumala ni Carisma, padayon ang ilang pagpangandam lakip na ang paglimpyo sa mga classroom, paghan-ay sa mga pasilidad, ug koordinasyon sa mga school personnel aron mahatagan ug komportable ug luwas nga learning environment ang mga estudyante sa pagsugod sa klase.
Gipahimangnoan usab sa ahensya ang mga ginikanan nga sayong magpalista ug siguruhong kompleto ang school requirements sa ilang mga anak aron malikayan ang kalangay sa enrolment ug pagpasulod sa klase.
Giawhag usab ang mga estudyante nga magpokus na sa ilang pag-eskwela ug likayan ang mga butang nga mahimong makaapekto sa ilang pagtuon.
