Hugot nga police visibility ang karon ginapatuman sa General Santos City Police Office human magpagawas ug marching order ang Regional Headquarters aron mapugngan ang posibleng mga krimen sa nagkalain-laing lugar sa siyudad.
Base sa direktiba, gipahugtan sa kapulisan sa napulo ka police station sa syudad ang ilang pagpatrolya ug pagmonitor ilabina sa mga pampublikong lugar, dalan, ug mga lugar nga kasagarang daghan og tawo. Lakip sa ginapunting sa kapulisan mao ang pagpugong sa mga kawat, pagpangdaot sa kabtangan sama sa pagpangbuak sa salamin sa sakyanan, ug uban pang kriminalidad.
Matud sa kapulisan, kabahin kini sa padayong kampanya aron mapaligon ang seguridad ug kalinaw sa komunidad. Dugang pa, aduna usab direktiba gikan kang P/Col. Eric De Venancio alang sa mga police personnel sa City Headquarters nga mas aktibong motabang sa police operations ug police visibility sa nagkalain-laing bahin sa syudad.
Gipahimangnoan usab sa kapulisan ang publiko nga magmatngon ug makigtambayayong sa mga otoridad pinaagi sa dayong pagreport sa mga kahina-hinalang lihok aron malikayan ang mga posibleng insidente sa krimen.
