Pormal nga natapos ni President Ferdinand Marcos Jr. ang iyang upat ka adlaw nga State Visit sa Japan, nga iyang gihulagway nga “highly productive and constructive,” human niya masiguro ang mga importanteng kasabutan sa ekonomiya, seguridad, ug diplomasya alang sa Pilipinas.
Matod sa Presidente, ang maong pagbisita nagpalig-on pa sa pito ka dekada nga relasyon sa taliwala sa Pilipinas ug Japan.
Lakip sa mga highlight sa biyahe mao ang pakigkita ni Marcos kang Emperor Naruhito ug Empress Masako, ingon man sa Prime Minister sa Japan.
Ang duha ka nasod nagkahiusa usab nga isaka ang ilang relasyon ngadto sa usa ka Comprehensive Strategic Partnership.
Gipalapad pa sa Pilipinas ug Japan ang ilang kooperasyon sa depensa, enerhiya, artificial intelligence (AI), pamatigayon, ug seguridad sa kadagatan.
Gipahibalo usab ang pagsugod sa negosasyon alang sa General Security of Military Information Agreement (GSOMIA).
Samtang, ang Presidente nakakuha og US$3.4 bilyon nga mga saad sa pamuhunan (investment pledges) ug mga oportunidad sa negosyo gikan sa mga Japanese investors.
Gilauman nga kini makamugna og kapin sa 10,000 ka trabaho alang sa mga Pilipino.
Nakigkita usab si Marcos sa komunidad sa mga Pilipino sa Japan ug nipasalig nga ang kaayohan sa mga Overseas Filipino Workers (OFWs) magpabilin nga nag-unang prayoridad sa kagamhanan.
