Nasakmit sa mga otoridad ang gibanabang ₱3.4 milyon nga kantidad sa gidudahang shabu ug nadakpan ang usa ka drug personality atol sa buy-bust operation nga gihimo pasado alas-4:34 sa hapon niadtong Mayo 29, 2026 sa Deca Homes, Barangay Calumpang niing dakbayan sa Heneral Santos .
Ang operasyon gipangulohan sa Philippine Drug Enforcement Agency Sultan Kudarat Provincial Office uban sa PDEA SarGen Provincial Office, PDEA RO12 Regional Special Enforcement Team ug Philippine Drug Enforcement Group.
Giila ang nadakpan nga si alyas “Mamot,” 44 anyos, minyo, usa ka housewife ug residente sa Barangay Kuden, Talitay, Maguindanao del Sur.
Narekober gikan sa suspek ang gibanabang 500 gramos sa gidudahang shabu nga adunay standard value nga ₱3,400,000. Lakip sa nakompiska ang usa ka sachet nga adunay 50 gramos sa gidudahang shabu nga giingong subject of sale ug siyam pa ka sachet nga adunay kapin 450 gramos sa gidudahang shabu nga giingong subject of possession.
Nasakmit usab sa mga otoridad ang handbag, paper bags, mga cellphone ug buy-bust money nga gigamit sa operasyon.
Ang suspek mag-atubang og kaso sa paglapas sa Sections 5 ug 11, Article II sa Republic Act 9165 o mas nailhang Comprehensive Dangerous Drugs Act of 2002.
