GENERAL SANTOS CITY | Dili magpaulahi ang Sanguniang Panglungsod sa Gensan sa pagpadangat ug pahisubo sa pagkamatay ni kanhi President Fidel Ramos.
Matud ni Secretary to the Sanguniang Panglungsod Rosalinda Mondido, nga sigurado nga magmugna ug resolsyon ang konseho sa syudad alang sa pamilya sa kanhi Pangulo Fidel Ramos. Pagsaysay niini nga naandan sa dakbayan nga magmugna ug resolusyon alang sa pahasubo kung adunay mga opisyal nga mamatay hilabi na sa kanhi Pangulo. Gikadugang pa niini nga ipadala nila ang kopya sa resolusyon sa pamilya Ramos kung mapanday ug mahuman na ug himo sa konseho.
Pagka karon matud pa ginapahapsay pa sa Konseho ang Internal Rules and Procedure nga maoy basehan sa pagpahigayon ug sesyon sa 20th Council. Sumala pa angayan gayud pasalamatan si kanhi Pangulo Ramos tungod sa daghan nga proyekto ug mga proklamasyon nga nabutang sa syudad. Sama na lamang sa FVR Village 39.2 , Gensan airport, ug uban pang mga pasilidad.
