GENERAL SANTOS CITY – Pangandoy ni Sen. Manny Pacquiao nga mahatagan og lote og balay ang tanang kabus nga pamilya nga walay kaugalingon nilang pinuy-anan.
Ang pahayag ni Sen. Pacquiao dihang gibisita kagahapon ang Pacman Village sa Alabel Sarangani Province, halapad niining yuta nga may gipatukod nga mga balay nga gihatag niini sa mga informal settlers sa lugar.
Matud sa fighting senator, gawas sa Sarangani og GenSan plano pa niining manghatag ug libreng pabalay nga tukuron sa panag-iya niining mga yuta sa Kaulohan, Silang Cavite, Laguna, Batangas og sa uban pang lugar.
Gibutyag niini nga naluoy sa mga tao nga walay maayong matulogan.
Giangkon ni Sen. Pacquiao nga kaniadto nasinatian niya ang matulog sa kilid sa kalsada og dili niya gustong masinatian sa uban ang maong pait nga kasinatian.
Sa pamahayag pa sa Pambansang Kamao, unta hatagan pa siya og daghang blessings sa kinabuhi aron makab-ot ang pangandoy nga sulod sa 6 hangtod 7 ka tuig, matagaan og balay og lote ang mukabat sa 6.6 million nga kabus nga pamilya kung asa bisan piso ang walay mabayran og mugasto gikan sa sa iyang kaugalingong bulsa.
Gawas sa pabalay, daghan pang gustong himuon si Sen.Pacquiao sama na lamang sa pagtabang sa sektor sa agrikultura, economic development og imprastracture projects.
