GENERAL SANTOS CITY – Gikalipay sa hut-ong sa media sa Socsargen ang pakig-alayon sa Presidential Task Force on Media Security alang sa gipahigayong imbestigasyon kalabot sa pagpusil patay sa mediaman nga si Leo Diaz.
Gikumpirma ni John Paul Jubelag, presidente sa Socsargen Press Council og Socsargen Press Club nga gipakigkitaan niini si Presidential Task Force on Media Security Executive Director Jose Joel M. Sy Egco atul sa pagbisita sa dakbayan.
Ang nasampit ang nibisita sa ulahing vigil kagabie ni Diaz sa tacurong. Gibutyag ni Jubelag nga nakisayod ang mga opisyal kon unsa na ang dagan sa gipahigayong imbestigasyon sa kaso.
Gipasalig kaniya ni Egco nga muayuda ang ilang buhatan aron makab-ot ang hustisya alang kay Diaz.
Gikabutyag nga mihangyo ang pamilya nga dili lamang kapulisan ang mag-imbestiga apan lakip na NBI og CIDG.
NAsayran nga si Diaz, writer sa Manila Bulletin, kolumnista usab sa Sapol Newspaper og reporter sa usa ka AM radio station sa Cotabato City.
Kahibaluan nga gipusil ang nasampit sa wala mailhing mga suspetsado nga nakamotorsiklo samtang paingon sa Tacurong sakay sa iyang motorsiklo kauban ang anak og pag-umangkon aron unta mukuha og report.
