GENSAN- Dako gihapon ang posibilidad nga mabaliktad ang desisyon sa Korte Suprema kalabot sa gipetisyon nga temporary restraining order (TRO) sa kampo ni Senador Bato dela Rosa.
Sumala sa gihimong pagtuki ni Atty. Rey Cartojano, iyang gibana-bana nga anaa sa 50-50 o katunga ang tsansa nga mausab pa ang dagan sa istorya, sukwahi sa opinyon sa uban nga wala na gyud kini pag-asa.
Gitataw ni Cartojano nga bisan pa man sa mga naunang legal nga argumento ug sa mga baruganan sa nagkalayong legal experts, ang Korte Suprema naghupot og hingpit nga kagawasan ug independensya sa pagtuki ug pagresolba sa mga komplikadong isyu sa balaod.
Tungod niini, dili pa hingpit nga makaingon nga nakabentaha ang kagamhanan sa maong legal nga hisgutanan.
Dugang pa niya, usa sa lig-on nga timaan nga mahimo pang mausab ang desisyon mao ang kamatuoran nga adunay lima ka mga maghuhukom ang mipakita og pagsupak ug wala miuyon sa nahimong desisyon sa mayorya.
