Nagpahibalo ang General Santos City Police Office (GSCPO) nga andam silang motuman sa bisan unsang mando gikan sa korte, Department of Justice (DOJ), ug Philippine National Police (PNP) may kalabotan kang Senator Ronald “Bato” dela Rosa kon adunay legal nga basihan alang sa iyang pagdakop.
Sa pamahayag ni GSCPO Director PCol Nicomedes Olaivar Jr., giingon niyang adunay mga checkpoint nga gipahigayon sa dakbayan isip kabahin sa padayong operasyon batok sa mga wanted person ug uban pang target sa balaod.
Matud ni Olaivar, dili lamang si Dela Rosa ang ilang ginabantayan kundili apil usab ang ubang mga indibidwal nga adunay warrant of arrest.
Gipasabot usab sa opisyal nga andam ang kapulisan sa pagpatuman sa ilang mandato batok sa bisan kinsang ginapangita sa balaod basta adunay hustong legal nga basehan.
Hinoon, giklaro sa GSCPO nga hangtod karon wala silay namonitor nga impormasyon nga nagtago si Senator dela Rosa sa syudad sa General Santos.
