Gipagawas na sa International Criminal Court (ICC) ang agenda para sa status conference sa kaso ni kanhi Presidente Rodrigo Duterte karong Mayo 27.
Sumala sa international tribunal, naka-focus kini sa mga pagpangandam para sa husay sa kanhi presidente para sa mga krimen batok sa katawhan.
Lakip sa mga isyu nga hisgutan mao ang gisugyot nga petsa sa pagsugod sa husay, ang gidaghanon sa mga saksi ug ebidensya, mga eksperto nga saksi, mga lakang sa pagpanalipod sa saksi, mga obligasyon sa pagbutyag ug posibleng dugang nga mga insidente nga mahimong ilakip sa mga prosecutor sa kaso.
Nagtakda usab ang Trial Chamber og iskedyul para sa pagkonsiderar sa mga nauyonan nga kamatuoran, mga kinahanglanon sa interpretasyon ug paghubad, partisipasyon sa mga biktima ug mga mosyon nga kinahanglan sulbaron sa dili pa magsugod ang husay.
Ang unang status conference para sa husay sa kanhi Presidente ipahigayon sa publiko, bisan pa sumala sa mga maghuhukom, ang pipila ka bahin niini mahimong himuong pribado kung adunay mga sensitibo nga isyu nga gipatungha nga may kalabotan sa seguridad sa mga saksi.
