Gipangunahan ni Pope Leo XIV ang usa ka makasaysayanong katapusang misa kagahapon, Domingo alang sa kapin sa usa ka milyon nga mga batan-ong Katoliko gikan sa tibuok kalibutan.
Sa kataposang misa sa Santo Papa isip kabahin sa usa ka dakong youth pilgrimage nga nagtigom sa mga batan-on gikan sa tibuok kalibotan sa pagsaulog sa Jubilee holy year nga adunay tema sa pagtuo, panaghiusa, ug paglaom.
Sa hinapos sa semana, 500,000 ka batan-on ang nangabot sa Roma, ug pagka-Sabado sa gabii, ang mga tig-organisa nagtaho nga niabot na sa 800,000 ang mitambong sa vigil.
Kagahapon lamang, misaka ang gidaghanon ngadto na sa usa ka milyon.
Daghan sa mga nanambong nagkampo sa gawas, nangatulog sa mga tolda, mga sleeping bag, o mga banig samtang naghulat sa misa.
Ang misa gihimo sa udto, ug gipangulohan sa Santo Papa, nga miabot sakay sa helicopter.
Dugang pa, ang misa giubanan sa mga kanta gikan sa usa ka choir sa usa ka dako nga entablado nga gidesenyuhan sa usa ka bulawan nga arko ug usa ka dako nga krus.
