GENERAL SANTOS CITY – Wala pa gihapon nailhan ang patay’ng lawas sa usa ka babaye nga nakaplagang patay kagahapong adlawa sa sapa sa Kasilag, Silway, Fatima Brgy Dadiangas West ning dakbayan.
Nagpabilin pa sa puneraya ang nasampit nga patay’ng lawas, kung asa gipaabot nga may pamilya nga muila ug mukuha niini.
Nasayran nga ang naasoy’ng patay’ng lawas ang naka-bra lamang ug naka-pantalon, ug may mga paslot sa lawas.
Kahinumduman nga gibutyag ni Police Chief Insp. Nestor Maderse Jr nga paabuton pa nila ang resulta sa paghiling sa taga Scene of Crime Operatives o SOCO aron mahibaw-an ang mga samad sa biktima.
Sa kasamtangan dili pa masulti kon may foul play sa pagkamatay sa biktima nga gituhu-an nga anaa sa kapin 20 anyos ang pangidaron.
Nasuta nga kulay violet ang kolor sa mga kuko sa biktima samtang taman sa abaga ang iyang buhok, apan dili na mailhan ang iyang panagway.
Kahinumduman nga miaging gabii, nakasinati ug makusog nga pag-ulan ang dakbayan lakip ang mga silingan nga kasikbit lugar nga nagresulta sa pagkusog sa baha sa Silway river.
