GENERAL SANTOS CITY – Gihingusgan ni Atty Luis Salazar, inilang abugado sa SOCCSKSARGEN, nga usa ka pagpangilad ang ginahimo sa KAPA kon Kabus Padatoon sa pagdumala sa founder niini nga si Joel Apolinario.
Kini human human nagpagawas ug sertipikasyon gikan sa Security and Exchange Commission kon SEC gikan sa Davao City nga ang KAPA usa ka rehistrado nga non-stock corporation isip usa ka ministry o simbahan.
Tataw matud pa kini nga pamatuod nga pagpangilad gayud ang ginahimo nilang Apolinario, gumikan ang ang ilang pagka-rehistro ang isip lamang usa ka simbahan ug walay katungod nga mangolekta ug salapi o makaangkon ug financial gain o profit.
Sukwahi kini sa kasamtangang ginahimo karon sa grupo nga nagapangolekta ug investment pinaagi kunuhay sa donasyon, sa pasalig nga 30% nga interes nga madawat matag bulan.
Apan gumikan gahi lamang ang ulo sa mga tawo hinungdan nga misugot na lang magpailad bisan ug tataw na kaayo nga ginailad, ug gidawat na lang isip willing victim.
Gisaysay ni Atty Salazar nga ang ginahimo sa KAPA usa ka matang sa Ponzi Scheme kon pagpangilad, nga 1920’s pa, una pa ang kalibutanong gubat, kung asa daghan na kaayo ang nailad niini hilabi na sa Amerika.
Ug ang ginahuptan nga SEC registration sa KAPA ang aron mag-operate isip usa ka sekta lang o simbahan, apan wala sila gihatagan ug katungod nga mangolekta ug salapi.
Ug gani, bisan ang magbaligya ug bibingka bisan unsang mga butang o pagkaon ang dili usab nila pwedeng himuon gumikan dili sila rehistrado o wala silay katungod nga himuon kini, isip usa ka ministry o sekta lamang.
Dungan niini, gihagit ni Atty Salazar ang founder sa KAPA nga si Apolinario, nga kasuhan siya kon ugaling nagsulti siya’g bakak may kalabutan sa registration sa maong investment scheme.
Kahibaluan nga sa website sa SEC, nanguna ang KAPA sa listahan sa mga investment group nga gipagawasan ug advisory sa ahensya.
