Nagpasidaan si P/Maj. Mark Gerald Norbe, operation officer sa Regional Anti-Cybercrime Unit 12 o RACU 12, batok sa nagkadaghang fake news nga nagkatag sa social media nga maoy hinungdan sa kalibog ug panic sa publiko.
Matud ni Norbe, importante nga masuta una pag-ayo ang impormasyon ayha kini i-share online aron malikayan ang pagpakatag sa sayop nga balita.
Gipasabot usab niini nga usa sa epektibong paagi sa pagsuta sa fake news mao ang pagtan-aw kung gikan ba kini sa opisyal ug kasaligan nga tinubdan sama sa mga verified nga media pages ug government agencies.
Dugang pa niya, kinahanglan usab tan-awon ang petsa sa balita, hulagway, ug caption kay usahay gigamit pag-usab ang mga daang litrato ug videos aron mahimong makalilisang o makapahisalaag nga impormasyon.
Gipahinumdoman usab sa opisyal nga adunay legal nga silot ang mga mapamatud-ang nagpakaylap og fake news ilabina kon makahatag kini og kadaot o kahadlok sa publiko.
Samtang nagpadayon ang pagmonitor sa kapulisan ug uban pang ahensya batok sa disinformation, giawhag ni Norbe ang publiko nga mahimong responsable sa paggamit sa social media ug likayan ang dali-daling pagtuo ug pag-share sa mga impormasyon nga wala pa mapamatud-i.
