GENERAL SANTOS CITY – Na-turn over na sa Lanton City Jail ang babaye nga No. 3 most wanted kidnapper sa tibuok nasud ug miyembro sa dakong kidnap for ransom group, nga nasikop sa gipahigayong manhunt operation sa kapulisan sa Sta Cruz, Silway, Brgy Dadiangas West ning dakbayan, miaging adlaw.
Kini ang gikumpirma ni Police Senior Inspector Robert Fores sa Makar Police Station.
Kahinumduman nga giila ang dinakpan nga si Emily Pedtucasan alyas Princess Montalia nga daghan pag laing alyas nga ginagamit sa ilang modus.
Ug gani, lakip kini sa poster sa mga wanted nga ginapakatag sa CIDG sa tibuok nasud.
Giaresto ang nasampit base sa warrant of arrest nga gipagawas RTC 11 Branch 36, alang sa kasong kidnapping, carnapping ug serious illegal detention.
Nasayran nga ang dinakpan mao ang nag-unang suspek sa pagkidnap sa upat ka negosyante gikan dinhi sa dakbayan kaniadtong 2015, lakip usab sa pagdagit sa usa ka Japanese national ug uban pang serye sa kidnapping.
Una nang gikabutyag nga modus sa grupo mao ang magpakaron-ingnon nga mangarkila sa mga rent-a-car dayon dal-on ang sakyanan sa Maguindanao, dayon magdeklara ug kidnapp, dayon kuhaon ang sakyanan ug ibaligya sa uban.
Nalambigit usab matud pa sila sa Abu Sayyaf Group, ug gikabutyag nga may patong sa ulo.
