GENERAL SANTOS CITY – Nadugangan na usab ang ihap sa mga miyembro sa Kabus Padatoon (KAPA) nga nagpasaka ug pormal nga reklamo batok sa maong investment scam human nga nakabutang og sobra sa katunga sa milyon ka pesos.
Kini human nga midangop sa National Bureau of Investigation(NBI) Sarangani District Office ang usa ka negosyante nga mibalibad nang ibutyag ang iyang pangalan.
Nasayran sa Bombo Radyo GenSan sa NBI SARDO nga miabot matud pa og P555,000 ang na-invest sa maong reklamante una miangkon nga ang maong salapi ang halin human nga gibaligya ang sakyanan og gikan sa gi-loan nga salapi.
Giangkon nga nalubong na kini sa utang og naglisod karon tungod may gigastuhan pa nga mga estudyante sa ilang pagtungha.
Gusto sa nasampit nga magpatabang sa NBI aron magpasaka og kaso batok kay KAPA founder Pastor Joel Apolinario ug uban ang nalambigit sa KAPA investment scam.
Nasayran nga maong negosyante ang ikalima nang miyembro sa KAPA nga nagpatabang sa NBI.
