GENERAL SANTOS CITY – Patung-patong nga kaso ang atubangon og gilaumang ipasaka karong adlawa batok sa kapitan sa Tinoto, Maasim, Sarangani Province nga si Rajik Kudarat.
Giandam na ang kasong paglapas sa Section 11 kon Possession of Dangerous Drugs sa RA 9165 kon Comprehensive Dangerous Drugs Act of 2002 ug RA 10591 kon Comprehensive Law on Firearms and Ammunition ang ipasang-at kay kapitan Kudarat nga kasamtangang balhug sa PDEA-12 Detention Facility.
Kahibaluan nga sa atul sa gipatumang search warrants sa hiniusang pwersa sa PDEA-12 ug uban pang unit sa kapulisan ug kasundaluhan sa balay niini sa Proper Tinoto, Barangay Tinoto, Maasim miaging adlaw, nakumpiska ang 15 gramo sa shabu nga balor og P75,000.00 gawas pa sa lain laing matang sa pusil og daghang bala.
Gikumpirma ni Director Gil Cesario Castro nga si Kudarat usa ka high value target ug nalakip sa narcolist ni Pangulong Rodrigo Duterte.
Samtang laing upat pa ka drug group member partikular sa Primo Drug Group, ang gisulod sa kapulisan human sa panimalay sa kapitan, kung asa ubay-ubay ka mga armas ug bala ug dakong kantidad sa shabu ang nakumpiska sa mga otoridad.
