Malinawon ang pagsaulog sa Eid’l Adha diin nagtapok ang mga Muslim sa General Santos City alang sa congregational prayer nga gipangunahan ni Sheikh Ibrahim Andang Jr. sa MSU High School Quadrangle kaganihang buntag.
Ang maong kalihokan gi-organisa sa City Government of General Santos pinaagi sa Muslim Concerns and Affairs Division (MCAD), isip pagpasidungog sa usa sa labing sagradong kasaulogan sa Islam nga naghulagway sa pagtuo ug pagkamasinugtanon ni Propeta Ibrahim ngadto sa Allah.
Gani, gidasig ni Sheikh Andang ang Muslim community sa pagpadayon sa panaghiusa, kalinaw ug pagtinabangay ilabi na niining panahon sa Eid’l Adha.
Mitambong usab sa kalihokan ang mga lokal nga lider, relihiyosong personalidad ug mga pamilyang Muslim gikan sa nagkalain-laing barangay sa siyudad.
