MAASIM, SARANGANI – Gihingusgan ni PCI Marcelo Mendoza, chief of police sa Maasim Municipal Police Station nga remnants sa napatay nga kanhi lider sa Ansar Al-Khilafa Philippines nga si Tokboy Maguid ang napatay sa gihimong manhunt operations sa kapulisan Sitio Lebe, Barangay Daliao Maasim Sarangani kagahapon.
Ang napatay nga terorista nailhan nga si Bassir Sahak samtang samdan ang amahan niini nga si Kupang Sahak apan wala nadakpan.
Nakuha sa encounter site ang patay nga lawas ni Sahak, usa ka M-16 rifle, bandolier, backpacks, cellphones, mga bala sa lainlaing armas og mga IED.
Gibutyag ni Marcelo, ang gihimong operasyon pinasubay sa Arrest order Number 2 nga gipagawas ni Pangulong Rodrigo Duterte.
Sa report nga gipagawas sa Police Regional Office-12, si Sahak ang nagpaluyo matud pa sa pagpabusikad sa Apopong, GenSan niadtong Sept.16, 2018 nga gikaangkol sa dili muobos sa napulo katao.
Ug basi sa intelligence report nga gigunitan sa PNP 12, si Sahak ang lider sa gikonsiderang Special Operations Group sa Ansar Al Khilafa Philippines nga in-charge sa liquidation og uban pang money making activities.
Aduna usab direktang relasyon sa mga ISIS inspired group sa Sulu ingon man kang Dawla Islamiyah leader Abu Toraife og sa uban pang ISIS inspired groups sa ubang nasud.
Samtang, nagpasalamat si Acting Mayor Uttoh Salem Cutan sa Maasim Sarangani sa pagka-neutralize sa mga otoridad sa nasampit nga terrorist member.
Matud pa ni Cutan, nalubong na si Sahak subay sa tradisyong Islam.
Sa nadawat niyang intelligence report, tungod sa sunod-sunod nga operasyon sa kapulisan sa Polomolok South Cotabato batok sa mga remnants ni Tokboy Maguid, miadto si Sahak sa Brgy Daliao kung asa may yuta sila nga giangkon.
Gibutyag ni Cutan, gi-istorya si Sahak og ang amahan niini nga mutahan na sa gobyerno apan wala nagpatuo og nagpadayon sa ilang dautang hinimuan.
Nanghinaut ang nasampit nga hingpit ng mawala ang mga gustong muguba sa kalinaw sa ilang lungsod. Ug kini pinaagi sa panaghiusa sa otoridad og sa mga katawhan sa Maasim.
Gibutyag ni Cutan, niadtong buhi pa ginabaharan ni Bassir og sa grupo niini ang mga kapitan sa Maasim.
Ug gani, sa impormasyon adunay gustong patyon si Bassir nga opisyal tungod matud pa sa bangi sa yuta.
