Nagpabiling alerto ang kapulisan human sunod-sunod nga napa-report ang pagpangbuak ug mga salamin sa sakyanan sulod sa area of responsibility sa Pendatun Police Station ning syudad sa General Santos.
Base sa impormasyon gikan sa kapulisan, pipila ka mga sakyanan ang nabiktima sa maong insidente ilabina kon gabii ug kadlawon diin kalit lang pangbuakon ang mga salamin sa mga nakapark nga sakyanan sa pipila ka lugar sakop sa ilang hurisdiksyon. Ginasusi karon sa mga otoridad kon adunay grupo o indibidwal nga nagpaluyo sa maong mga pagpangdaot.
Matud sa kapulisan, padayon na ang ilang pagpatuman sa mas hugot nga police visibility pinaagi sa dugang nga pagpatrolya ilabina sa mga lugar nga kasagarang ginaparkan sa mga sakyanan. Gitan-aw usab nila ang mga kuha sa CCTV cameras aron mailhan ang posibleng mga suspek nga responsable sa sunod-sunod nga pagpangbuak sa mga salamin.
Gipahimangnoan usab sa kapulisan ang publiko nga likayan ang pagbilin ug mga bililhong gamit sulod sa sakyanan ug siguruhong hayag ug luwas ang parkinganan aron malikayan nga mahimong target sa mga kriminal.
