Nasakmit sa joint elements sa Philippine Coast Guard ug Philippine National Police ang kapin ₱27.4 milyon nga kantidad sa gitouhang smuggled nga sigarilyo atol sa usa ka anti-smuggling operation sa usa ka bodega sa Tacurong City.
Base sa report sa mga otoridad, mikabat sa 640 ka master cases sa sigarilyo ang ilang nakumpiska atol sa joint operation nga gihimo human sa surveillance ug monitoring sa maong lugar.
Gituohang mga kontrabando ang mga sigarilyo tungod kay wala kini’y hustong dokumento ug posible nga misulod sa nasud nga wala moagi sa legal nga proseso sa Bureau of Customs, hinungdan sa dakong pagkawala sa kita sa gobyerno gikan sa buhis.
Gilayon nga gidala sa Police Regional Office 12 ang tanang nakumpiskang sigarilyo alang sa hustong dokumentasyon ug pagpreserba sa ebidensya samtang nagpadayon ang lawom nga imbestigasyon sa mga otoridad.
Padayon karon nga ginasuta sa kapulisan ug Coast Guard ang tinuod nga tag-iya sa bodega ug ang mga indibidwal nga posibleng nalambigit sa ilegal nga operasyon sa pagpamuslit sa sigarilyo sa rehiyon.
