Nakatabang ang Philippine Red Cross (PRC) sa kapin 8,700 ka pasyente atol sa ilang nationwide “Undas Operation 2026”, base sa datos hangtod alas 9:00 sa buntag karong Nobyembre 2.
Sa kinatibuk-an, 8,721 ka indibidwal ang gipakuha og vital signs, 359 ang gitambalan sa minor nga mga kaso sama sa pagkalipong ug samad, samtang 19 ang giatiman tungod sa seryosong kondisyon.
Siyam usab ka pasyente ang gidala sa ospital tungod sa grabe nga kondisyon, lakip ang stroke ug cardiac arrest. Naghatag usab ang PRC og 297 ka welfare assistance, lakip ang psychological first aid, pagkaon, tubig ug tabang sa paggamit og wheelchair.
Nagdeploy ang organisasyon og 1,977 ka personnel ug volunteers, uban ang 73 ka ambulansya, 404 ka first aid station ug 131 ka welfare desk aron paspas nga makatubag sa mga emerhensya.
Gibantayan sa mga rescue unit ang 349 ka sementeryo, 17 ka bus terminal, siyam ka pantalan, duha ka tugpahanan ug uban pang daghang tawo nga lugar samtang magpadayon ang operasyon hangtod Nobyembre 3.
