Gikumpirmang patay ang tanang siyam ka tawo nga sakay sa usa ka pribadong eroplano nga nahagsa mga siyam ka milya ang gilay-on gikan sa Mar-a-Lago estate ni US President Donald Trump sa Palm Beach County, Florida.
Sumala sa Federal Aviation Administration (FAA), nahagsa ang Learjet 60 sa usa ka residential area duol sa Cresthaven pasado alas-12:50 sa hapon niadtong Domingo, Nobyembre 1.
Gikan sa Austin-Bergstrom International Airport sa Texas ang maong eroplano ug padulong unta sa North Eleuthera Airport sa Bahamas sa dihang nahitabo ang grabeng aksidente.
Nakuha sa usa ka dashcam video ang paspas nga pagkahagsa sa eroplano sa yuta ug mibuto, nga miresulta sa dakong kalayo.
Gihulagway ni US Transportation Secretary Sean Duffy ang insidente isip usa ka “horrific tragedy.”
Nagpadala na usab og team ang FAA aron motabang sa imbestigasyon nga pangunahan sa National Transportation Safety Board (NTSB).
Sa pagkakaron, wala pa gipagawas ang mga ngalan ug pagkatawo sa mga namatay.
Padayon usab nga giimbestigahan sa mga otoridad kung adunay mga residente sa maong lugar nga nasamdan o naapektuhan sa aksidente.
