GENERAL SANTOS CITY – Gihingusgan ni Mayor Lorelie Pacquiao nga gihatag na ang tananng makaya sa okal nga gobyerno aron matabangan ang mga traysikol drayber nga makakuha ug franchise, pinaagi sa pagpaubos sa bayronon nga nahimong P100 na lang aron dili bug-at sa bulsa.
Matud ni Mayor Pacquiao, sa pagkakaron anaa pa lamang sa 2,600 ang nakakuha og bag-ong franchise ug 2,500 lamang ang nakaparenew, layo pa kini sa gidaghanon sa tanang traysikol nga nagdagan sa dakbayan.
Gipahimangnoan usab sa mayor nga sa umaabot nga Agosto 18, padayon nga ipatuman ang operasyon sa pagpangdakop sa mga kolorom nga traysikol sa dakbayan apil ang mga franchise holder nga expire ang ilang prangkisa.
Gipasabot sa LGU nga ang maong lakang dili lang aron masiguro nga legal ug patas ang operasyon sa tanang traysikol, kundili aron maprotektahan usab ang kinabuhi ug seguridad sa mga pasahero pinaagi sa pagpaniguro nga ang mga sakyanan mosunod sa safety standards.
Gilauman sa LGU nga pinaagi sa pagpatuman niini, maminusan ang ihap sa kolorom nga mga traysikol ug mapaayo ang serbisyo sa transportasyon sa dakbayan.
