GENERAL SANTOS CITY – Laing pagpamusil na usab ang natigayon sa dakbayan sa Daproza Avenue, Brgy Dadiangas West ning siyudad.
Sa pakighinabi sa Bombo Radyo kang Police Chief Inspector Roel Abejero, hepe sa Pendayun Police Station, kritikal sa balay-tambalanan ang lalaki nga biktima tungod sa naangkon nga samad-pinusilan sa likod, tuo nga abaga ug bukton.
Matud pa, walay nakuha nga unsa mang butang o ID ang kapulisan gikan sa biktima.
Hinuon, sa deskripsyon sa biktima, dakuon ang lawas niini, may tattoo nga tribal sa tuo nga kamot, 5’2″ ngadto sa 5’5″ ang height, ug itumon.
Gikabutyag sa usa ka testigo nga naglingkod matud pa siya gawas sa usa ka convenience store duol sa Bulaong Terminal, dihang nakadungfog ug sunud-sunod nga buto sa pusil, ug nakita na lamang ang biktima nga nahagba na.
Paspas matud pang mipalayo ang upat ka suspek nga sakay sa duha ka motorsiklo.
Sumala pa nga nagkalo ug naka-mask ang mga suspek nga pulos mga lalaki.
Ang mga angkas matud pa mao ang mitiro sa biktima.
Sa karon padayon ang gipahigayong imbestigasyon sa kapulisan.
