GENERAL SANTOS CITY – Padayon ang imbestigasyon sa mga kapulisan sa nahitabong pagpamusil patay sa usa ka sikad drayber sa Purok Mudia, Barangay Labangal ning dakbayan sa Heneral Santos.
Nailhan ang maong biktima nga si Basser Manampao Sambaga, 38 anyos ug kasamtangan nakapanimuyo sa Purok Vista, Barangay Sinawal ning dakbayan.
Nakaangkon ug samad pinusilan sa nagkadaiyang bahin sa iyahang kalawasan ang maong biktima hinungdan sa iyahang hinanaling kamatayon.
Matud sa mga kapulisan duha ka wala mailhing tawo ang misakay sa sikad sa biktima gikan sa ilang terminal nga nahimutang sa Buan Public Market, subay sa Purok Buan, Barangay Sinawal, paingon sa Purok Mudia, Barangay Labangal, ug didto na nahitabo ang insedente sa bahin sa Purok Mudia.
Narekober sa maong crime scene ang walo ka fired cartridges sa gidudahang 45 calibere sa armas .
Nakit-an usab sa lugar sa nahitaboan cellphone sa biktima ug gisumite kini sa RACU 12 alang sa Digital Forensic Examination.
Dugang pa niini, ang patayng lawas sa biktima gi-claim sa iyang pamilya ug nipirma og waiver nga dili na sila interesado nga susihon ang lawas sa biktima isip pag-obserba sa ilang Islamic Burial Rites
