Nangandam na ang duha ka kapulungan sa Kongreso alang sa nagsingabot nga impeachment trial batok kang Vice President Sara Duterte.
Kagahapong adlawa ang mga opisyal sa House of Representatives, nga gipinangulohan ni House Secretary Reginald Velasco, nipahigayon og ocular inspection sa Senado aron susihon ang mga butang nga gamiton sa husay.
Ang witness stand nga unang gigamit sa impeachment trial ni kanhi Supreme Court Chief Justice Renato Corona gibutang na usab sa plenaryo sa Senado.
Matod ni Velasco nga nalipay siya nga nakakita sa mga pasilidad nga gamiton alang sa impeachment trial.
Nihangyo sila nga adunay duha ka lawak nga gamiton sa 11 ka prosecutors ug sa secretariat support group.
Sa laing bahin, si Senate Secretary Renato Bantug niingon, hangtod karon wala pay dakong gasto ang Senado.
Gawas sa pag-refurnish sa in-house witness stand nga gigamit ni Corona ug mga sapot nga isul-ob sa mga senator-judges, way dakong gasto .
Kalabot sa mga abogado sa senado, si Bantug niingon nga aduna na silay gikahinabi nga motabang sa pagpalambo sa mga lagda ug pamaagi sa impeachment trial.
Kon kolor sa sapot nga isul-ob sa mga senator-judges ang hisgotan, si Bantug niingon nga ang kolor nga maroon susama ra sa gigamit dihang gisuwayan si Corona.
Matod niya nga tulo na ka mga senador ang nakasukod na sa kupo ug target nga mahuman na ang sukod sunod semana.
Sa kataposan, niingon ang kalihim sa Senado nga padayon ang ilang komunikasyon sa ilang katugbang sa kamara alang sa impeachment trial ni VP Sara.
