GENSAN- Gipalig-on sa Traffic Enforcement Unit Gensan ang ilang checkpoint operations batok sa mga colorum nga pampasaherong traysikol sa dakbayan aron mapalig-on ang kaluwasan, kahapsay ug patas nga sistema sa pampublikong transportasyon.
Sumala sa TEU, adunay mga traysikol nga nadakpan, natiketan ug gi-impound tungod sa kakulang sa hustong prangkisa ug permit subay sa mga balaod ug ordinansa sa syudad.
Gipasabot sa ahensya nga dili tumong sa operasyon ang pagpugong sa pagpanginabuhi sa mga drayber kondili aron maseguro nga legal ug luwas ang operasyon sa pampublikong transportasyon sa Gensan.
Gihatagan usab og importansya sa TEU ang proteksyon sa mga lehitimong driver ug operator nga misunod sa tukmang proseso ug migasto aron mahimong legal ang ilang byahe.
Giingon sa TEU nga dili makatarunganon sa mga legal nga operator kon pasagdan lamang ang mga colorum nga makabiyahe bisan walay permit ug walay pagsunod sa regulasyon.
Tungod niini, padayon nga gihagit sa ahensya ang tanang operator ug drayber nga ayuson ug himuong legal ang ilang operasyon aron malikayan ang silot.
Gipasalig usab sa TEU nga magpadayon silang patas ug makatawhanon sa pagpatuman sa balaod alang sa kaayohan sa publiko ug sa mga lehitimong nanginabuhi.
