Gisiguro sa Philippine National Police ang ilang bug-os nga kooperasyon sa bag-ong gitukod nga Extra-Judicial Killings Truth Commission. Tumong sa komisyon mao ang pagdokumento sa mga pagpatay ug pag-abuso ilawom sa madugong kampanya batok sa ilegal nga droga sa administrasyon ni kanhing Pangulo Rodrigo Duterte.
Sa usa ka pamahayag kagahapon, Mayo 29, miingon si PNP Chief Gen. Melencio Nartatez Jr. nga malipayong ginadawat sa kapulisan ang bisan unsang independent initiatives nga nagtinguha sa paghatag og klaro ug pag-ayo sa nasud.
Gipasiugda niya nga suportado sa nasudnong pulisya ang pagpangita sa kamatuoran ug makigtambayayong sa komisyon subay sa legal nga mga pamaagi.
Gitukod ang maong komisyon sa mga lider sa civil society ug adunay bug-os nga suporta gikan sa Simbahang Katoliko.
Sumala ni Cardinal Pablo Virgilio David, nga magsilbing adviser sa lupon, ang maong lakang usa ka higayon sa catharsis o espirituwal ug sosyal nga pagpanghinlo aron mapasig-uli ang dignidad sa nasud.
Giingon usab ni kanhing International Criminal Court Judge Raul Pangalangan, ang chairman sa komisyon, nga ilang prayoridad mao ang pagpaminaw sa mga istorya sa mga biktima ug pag-ila sa ilang kasinatian ug pagkatawo.
Samtang, gipasalig ni Gen. Nartatez nga ubos sa bag-ong liderato sa PNP, magpadayon ang mga reporma sa pagpahigayon sa anti-drug operations ug magpabilin nga nakatutok sa transparency, hustisya, ug accountability sa institusyon.
