GENSAN- Padayon ang gihimong monitoring sa kapulisan batok sa giingong ilegal nga drag racing human adunay pipila ka mga indibidwal nga nadakpan kinsa gidudahang nalambigit niining maong delikadong kalihokan.
Matod ni PCPT. Lamberto Rabino Jr., ang Deputy Chief sa Traffic Enforcement Unit sa Gensan, ila pa karong gisusi ug giberipika kung aduna ba gayoy nahitabong pustahanay sa maong lumba o madasigon lang nga nagpadagan og paspas ang maong mga motorista.
Gipasabot usab ni Rabino nga magkalahi ang tinuod nga drag racing nga adunay pusta ug ang lumba-lumba lang o gitawag nga speed contest.
Subo usab nga gipadayag sa opisyal nga base sa ilang mga narekord nga taho, aduna gihapoy mga menor de edad ang padayong nagasupak sa balaod ug nag-apil-apil niining maong pakiglumba sa kadalanan.
Tungod niini, hugot nga gipahibalo sa otoridad nga dili nila lung-an ang pagbantay aron masiguro ang kaluwasan sa publiko batok sa mga iresponsableng drayber.
Gilauman usab ang kooperasyon sa mga ginikanan aron mabadlong ug mapugngan ang ilang mga anak sa pag-apil niining peligroso nga kalingawan.
