GENERAL SANTOS CITY – Temporaryo una nga ibutang ang impounding area sa Traffic Enforcement Unit (TEU) dinhi sa Dakbayan ngadto sa compound sa kanhi Rajah Buayan Airport.
Matud ni Mayor Lorelie Pacquiao nga kini ang nakasabotan tali sa iyang opisina og sa TEU human nga nahisgotan nga kinahanglan na gyud mahawan gikan sa mga sakyanan ang likod nga bahin sa Dr. Jorge P. Royeca Hospital human nga sa dugay panahon gihimo nga impounding area sa TEU.
Giangkon sa Mayor nga unang gisugyot niini nga sa Sanitary Landfill ibalhin ang impounding area apan wala matigayon tungod layo og lisod sa bahin sa mga tawo nga may transaksyon sa TEU nga muadto pa sa Brgy. Sinawal.
Gibutyag ni Mayor Pacquiao nga ang area nga hawaan sa TEU ang pagatukuran sa bag-ong gambalay sa City Health Office kung asa may inisyal na nga pondo nga P15 million.
