GENERAL SANTOS CITY – Guilty si Gemma Liboon sa alegasyon nga pagre-bag ug NFA nga bugas.
Kini ang gikumpirma sa Bombo Radyo ni Dionesio Hectin, provincial manager sa National Food Authority 11, base sa gipagawas nga resulta sa gihimong imbestigasyon sa ahensya miaging adlaw.
Gumikan kini sa nabisto nga gatusan ka sako sa NFA rice nga gire-bag aron mahimong commercial rice sa usa ka bodega sa Brgy Apopong, nga gipanag-iyahan sa rice miller nga si Herbert Tamone.
Ug gani, nagbayad na matud pa si Liboon ug P16,000 nga multa, samtang gi-withdraw na usab ang kapin 200 ka sako sa NFA rice nga nakumpiska sa bodega ni Tamone, ug gibalik sa NFA aron himuong ebidensya sa NBI, sa laing imbestigasyon nga ipahigayon.
Samtang, gibutyag usab ni Hectin nga aduna na lamang 800 ka sako nga anaa sa ilang bodega isip stock, kung asa plano nila kining ibutang sa rolling store.
